Իրավապաշտպան Սիրանուշ Սահակյանը հայտնում է, որ Բաքվում ապօրինի պահվող հայերի առողջական վիճակը գնալով ավելի վատթարանում է, ինչը մեծացնում է կյանքին սպառնացող ռիսկերը։
«Այս պահին դատավարությունները ավարտվել են, Կարմիր խաչը վտարված է, և որևէ միջազգային կառույց չի իրականացնում անկախ գործունեություն մարդու իրավունքների տեսանկյունից։ Մենք զրկված ենք նաև այդ հատվածական, կցկտուր պատկերային տեղեկատվությունից, որի միջոցով նախկինում հնարավոր էր բացահայտել խոշտանգման առանձին դրվագներ», – ասաց Սահակյանը։
Նրա խոսքով՝ պաշտոնական որոշակի տվյալներ դեռևս կարողանում են ստանալ Մարդու իրավունքների եվրոպական դատարանի միջոցով, սակայն դրանք հաճախ ձևական բնույթի են՝ առնչվելով գերիների առողջական վիճակի մասին։
«Երբ այդ տեղեկությունները համադրում ենք մեզ հայտնի օբյեկտիվ տվյալների, հեռախոսազանգերի միջոցով ստացված առողջական վիճակի մասին հաղորդումների և պաշտոնական փաստաթղթերի հետ, մեծ խզում ենք տեսնում։ Իսապես լրջագույն առողջական ռիսկեր պարունակող դեպքեր կան, սակայն դրանց մասին պատշաճ արձանագրում տեղի չի ունենում, և բժշկական ծառայություններ և սպասարկում չի տրամադրվում, որի միջոցով գոնե հնարավոր կլիներ ապահովել այս անձանց պատշաճ առողջական վիճակը», – ընդգծեց իրավապաշտպանը։
Ընտանիքների հետ հեռախոսազանգերի ընթացքում հայերը հիմնականում գանգատվում են առողջական խնդիրներից, որոնցից են՝ շնչառական, թոքային խնդիրները, որոնք նաև ազդում են ձայնի վրա կամ ուղեկցվում են հազով։
Սիրանուշ Սահակյանը նաև նշեց մեկ այլ խնդիր. դատապարտված հայերը չեն կարողանում ծանոթանալ իրենց դեմ կայացված դատավճիռների հետ։
«Ստացվում է՝ այս կեղծ, բեմականացված դատավարությունները ընթանում էին, որպեսզի «մեղքը» հիմնավորվի, սակայն ի սկզբանե նրանք զրկված են իրենց առաջադրված մեղադրանքները հասկանալու և դրանցից պաշտպանվելու հնարավորությունից։ Մենք ունենք մեկ դեպք, երբ ընդամենը քաղվածքն են տրամադրել, իսկ մնացած դեպքերում ո՛չ դատավճիռի ամբողջական տարբերակը, ո՛չ էլ քաղվածքը չեն տրամադրում», – տեղեկացրեց նա։
Սահակյանի գնահատմամբ՝ սա միտումնավոր է արվում՝ խոչընդոտելու միջազգային ատյանների միջոցով պաշտպանվելու հնարավորությունները։
Նրա խոսքով՝ միջազգային իրավական գործընթացներ մեկնարկելու նպատակով ջանքեր են գործադրվում անգամ չսպասելով պետության որևէ գործելակերպի։
Հիշեցնենք, որ Արցախի նախկին ռազմաքաղաքական առաջնորդների գործով դատավճիռները հրապարակվել են 2026 թվականի փետրվարի 5-ին, որտեղ ցմահ ազատազրկման են դատապարտվել Արցախի նախկին նախագահներ Արայիկ Հարությունյանը, Լևոն Մնացականյանը և Դավիթ Մանուկյանը, իսկ Արկադի Ղուկասյանը և Բակո Սահակյանը՝ 20 տարվա ազատազրկման։ Ռուբեն Վարդանյանին դատապարտել են 20 տարվա ազատազրկման։
