Երևանի ընդհանուր իրավասության դատարանի Ավանի նստավայրում երեկ տեղի է ունեցել քրեական հեղինակություն Ռուստամ Ստեփանյանի գործով հերթական դատական նիստը։
Նիստի ընթացքում քննարկվել է խափանման միջոցի հարցը։ Դատարանը, ուսումնասիրելով ներկայացված փաստարկները, որոշել է թողնել անփոփոխ կալանքի խափանման միջոցը։
Դատական նիստի ընթացքում կողմերը հանդես են եկել իրենց խոսքերով։ Մեղադրող կողմը՝ դատախազը, պահանջել է դատարանից կայացնել մեղադրական վերդիկտ, իսկ պաշտպանական կողմը՝ արդարացման որոշում։
Հաջորդ դատական նիստը նշանակված է հունիսի 10-ին, որի ժամանակ դատարանը կհրապարակի վերդիկտը։
Գործի էությունը
Ըստ մեղադրական եզրակացության՝ Ռուստամ Ստեփանյանը, նախնական համաձայնությամբ Ա. Կուրեղյանի, Հ. Սահակյանի և Սու. Գրիգորյանի հետ, ապօրինի ձեռք բերված հրազենով կազմակերպել և ղեկավարել է հանցակիցների գործողությունները՝ նպատակ ունենալով սպանել Սերգեյ Գրիգորյանին։ Քննության արդյունքում պարզվել է, որ 2024 թվականի հունիսի 11-ին, ժամը 23:15-ի սահմաններում, անմիջական մասնակցությամբ իրականացվել է սպանությունը։
Քրեական գործի նյութերում նշված է, որ «Չաղ Ռուստամ» անվամբ հայտնի Ռ. Ստեփանյանի և «Ֆազ» անվամբ հայտնի Ս. Գրիգորյանի միջև, անձնական հարցի կապակցությամբ, դեռևս 2018 թվականից ձևավորվել են թշնամական հարաբերություններ։ Իրավիճակը լարվել է 2020 թվականի դեկտեմբերին, երբ Ռ. Ստեփանյանի մտերիմ անձի ինստագրամյան էջից Ս․ Գրիգորյանի և վերջինիս մտերմուհու հասցեին սեռական բնույթի հայհոյանքներով մեկնաբանություններ են գրվել։
