Մայիսի 26-ին «Ուժեղ Հայաստան» կուսակցությունների դաշինքը հաջողությամբ անցկացրեց իր նախընտրական քարոզարշավի ամփոփիչ հանրահավաքը Վանաձորում։ Մարզկենտրոնի հանրահավաքը, որին ներկա էր մոտ 10 հազար քաղաքացի, դաշինքի առաջնորդ Սամվել Կարապետյանի և նրա թիմի համար հանդիսանում էր վերջին և ամենակարևոր կանգառը նախընտրական մրցավազքում։
Հանրահավաքի ընթացքում դաշինքի նախընտրական ցուցակի առաջին համար Նարեկ Կարապետյանը ներկայացրեց «Ուժեղ Հայաստան»-ի կոնկրետ առաջարկը Վանաձորի համար։ Նրա խոսքով՝ դաշինքը պլանավորում է Վանաձորում գործարկել մեծ մասշտաբի գործարան, որը կստեղծի հազարավոր նոր աշխատատեղեր։ Կարապետյանը նշեց, որ Վանաձորի բնակչությունը տասնամյակներ շարունակ անընդհատ կրճատվում է, քանի որ քաղաքը չունի բավարար տնտեսական հնարավորություններ։
«Մեր ծրագիրը պարզ է․ աշխատատեղեր բոլորի համար»,- ընդգծեց Նարեկ Կարապետյանը՝ հավելելով, որ դաշինքը պետք է վերականգնի Հայաստանի տնտեսական պոտենցիալը։
Հանրահավաքից հետո «Ուժեղ Հայաստան»-ի անդամները շփվել են հանրության հետ՝ լսելով քաղաքացիների կարծիքները և պատասխանելով նրանց հարցերին։
Հիշեցնենք, որ Հայաստանի Ազգային ժողովի ընտրություններին մասնակցում է 18 քաղաքական ուժ՝ 2 դաշինք և 16 կուսակցություն։ «Ուժեղ Հայաստան»-ի նախընտրական կարգախոսն է «Փոփոխություն»։ Կուսակցությունը ԿԸՀ է ներկայացրել 199 թեկնածուից բաղկացած ցուցակ, ինչպես նաև ազգային փոքրամասնությունների 3 թեկնածուներից բաղկացած լրացուցիչ ցուցակ։
Չնայած դաշինքի առաջնորդ Սամվել Կարապետյանը ցուցակում ներառված չէ, քանի որ նա բացի ՀՀ քաղաքացիությունից, ունի նաև Ռուսաստանի և Կիպրոսի քաղաքացիություն, կուսակցության ներկայացուցիչները պնդում են, որ հենց Սամվել Կարապետյանն է նրանց վարչապետի թեկնածուն։ Նրանք պլանավորում են, եթե մեծամասնություն ձեռք են բերում, փոխել Սահմանադրության այն կետը, որն արգելում է այն անձանց վարչապետ դառնալ, որոնք վերջին 4 տարին միայն ՀՀ քաղաքացիություն չեն ունեցել։
Վանաձորի նախկին համայնքապետ, «Ուժեղ Հայաստան» կուսակցության պատգամավորի թեկնածու Մամիկոն Ասլանյանը նշել է, որ հանրահավաքը լի էր դրական էներգիայով և հավաքված մարդիկ լիովին ներկայացնում էին Վանաձորի բնակչությանը։ Նա նաև ընդգծել է, որ Լոռու մարզում դաշինքի հաջողությանը նպաստում է նաև Սամվել Կարապետյանի Տաշիր քաղաքից լինելը։
