Այսօր՝ մարտի 10-ին, «Միասնության թևեր» քաղաքական նախաձեռնության անդամ Նարեկ Պարոնյանը Պաշտպանության նախարարության (ՊՆ) առջև կազմակերպված ակցիայի ժամանակ հայտարարեց, որ Հայաստանը 2025 թվականին ունեցել է տարածքային կորուստներ։
Նրա խոսքով՝ նախաձեռնությունը ունի հստակ փաստեր, որոնք հիմնված են պրոֆեսիոնալ հետազոտությունների արդյունքների վրա։ Պարոնյանը նշեց, որ օրեր առաջ ՊՆ-ն, ի դեմս իր ղեկավարի՝ Սուրեն Պապիկյանի, հերթական անգամ հասարակությանը սխալ տեղեկացրել է՝ հերքելով Ադրբեջանի կողմից ՀՀ սուվերեն տարածքի ներխուժումները։
«Մեր այցի պատճառը հերթական խաբեությունն է, զիջումները, տարածքի զավթումները, որոնք տեղի են ունեցել Ադրբեջանի կողմից»,- ասաց Պարոնյանը՝ ցույց տալով արբանյակային լուսանկարներ։
Նա նշեց, որ նախաձեռնությունը ունի արբանյակային լուսանկարներ, որոնք հստակ ցույց են տալիս ադրբեջանցիների կողմից իրականացված գործողությունները։ Ըստ նրա՝ Վարդենիսի տարածաշրջանում տեղի է ունեցել ադրբեջանական դիրքերի շինարարություն, ինչպես նաև դիրքային առաջխաղացումներ, որոնց արդյունքում ադրբեջանցիները ամրապնդել են իրենց դիրքերը։
«Սոթքի հանքը ամբողջովին գտնվում է ադրբեջանական վերահսկողության և դիտարկման տակ։ Կութ գյուղը, միջպետական ճանապարհը ևս գտնվում են վերահսկողության տակ։ Սա տեղի է ունեցել 2025 թվականի ընթացքում»,- հայտնել է նախաձեռնության անդամը՝ պնդելով, որ այս փաստերը հերքում են Նիկոլ Փաշինյանի և Սուրեն Պապիկյանի հայտարարությունները։
