Այսօր՝ մարտի 20-ին, Երևանում տեղի ունեցավ ողբերգական դեպք, որի հետևանքով մահացել է կին հետիոտն։
Դեպքը տեղի է ունեցել ժամը 15:10-ի սահմաններում՝ Վաղարշյան փողոցում, «Տիտան» սուպերմարկետի հարևանությամբ։ «SHACMAN» մակնիշի բեռնատարը վրաերթի է ենթարկել կին հետիոտնին։
Դեպքի վայր ժամանած ֆոտոլրագրող Գագիկ Շամշյանի տեղեկացմամբ՝ վարորդը փախուստի չի դիմել։ Օպերատիվորեն ժամանած Երևանի 103-րդ շտապօգնության բժիշկների հերթապահ խումբը հետիոտնի մարմնին արձանագրել է մահը։
Դեպքի վայր են ժամանել ՀՀ Ներքին գործերի նախարարության ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի պարեկները՝ գնդի հրամանատար Անդրանիկ Խաչատրյանի, գնդի հրամանատարի տեղակալ Արսեն Ստեփանյանի, գումարտակի հրամանատար Արմեն Գասպարյանի և վաշտի հրամանատար Արարատ Պետրոսյանի գլխավորությամբ։ Պարեկները սահմանազատել են դեպքի վայրը։
Տեղեկությունը փոխանցվել է ՀՀ Քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժին, որտեղից ժամանել է քննչական խումբը՝ բաժնի պետ Համբարձում Պետրոսյանի, բաժնի պետի տեղակալներ Գրիգոր Ավետիսյանի, Արթուր Ադամյանի և ավագ քննիչ Դավիթ Նալբանդյանի գլխավորությամբ։
Քննչական բաժնում նախաձեռնվել է քրեական վարույթ, որի շրջանակում պարզվում են մահացածի և վարորդի ինքնությունները։ Քննիչի հանձնարարականով ավտոմեքենան տեղափոխվում է ՊԾ Երևան քաղաքի գնդի պահպանվող հատուկ տարածք։
Ըստ նախնական տեղեկությունների, որը բացառվում է հերքվի, հետիոտնը փողոցն անցել է հետիոտնի համար նախատեսված անցման վայրով։
Դեպքից անմիջապես հետո վարորդի ինքնազգացողությունը վատացավ։ Պարեկային ծառայության կողմից դեպքի վայր կանչվեց շտապօգնության ավտոմեքենա, որտեղ բժիշկները բուժօգնություն են ցուցաբերում նրան։
