Հայաստանում մեկնարկել է «Կառուցելով իրական բազմալեզու ինտերնետ» խորագրով տարածաշրջանային համաժողովը, որը նվիրված է ինտերնետի բազմալեզվությանը, թվային ներառմանը և հատկապես՝ համացանցում հայերենի զարգացմանը։ Հանդիպմանը ներկա են ինտերնետ կառավարման և IT ոլորտի միջազգային առաջատար կազմակերպությունների ներկայացուցիչներ, փորձագետներ՝ Հայաստանից և արտերկրից։
Համաժողովի ընթացքում քննարկվում են համացանցի բազմալեզվությանն ուղղված «Համընդհանուր ընդունում» (Universal Acceptance) շարժման զարգացումները աշխարհում և մեր երկրում։ Օրակարգում են նաև թեմատիկ քննարկումներ՝ «Համընդհանուր ընդունման» տեխնիկական և գործնական կիրառությունները, «Տարբեր լեզուներ, մեկ ինտերնետ», «Բազմալեզու բովանդակության դերը թվային ներառման մեջ» և «Միջազգային համագործակցության նշանակությունը «Համընդհանուր ընդունման» խթանման գործում»։
«Ինտերնետ հանրություն» ՀԿ խորհրդի նախագահ Իգոր Մկրտումյանը նշեց, որ մեծ պատիվ է հյուրընկալել ոլորտի մասնագետներին։ Նա ընդգծեց, որ մասնակիցների շարքում մեծ թիվ են կազմում երիտասարդները, որոնք, իր խոսքով, Հայաստանի ապագան են։ «Կիրառել այս ամենը և ստեղծել հայալեզու ինտերնետը, հայալեզու բոլոր վեբ-կայքերը և ծառայությունները շատ մեծ նշանակություն ունեն»,- ասաց նա։
Իգոր Մկրտումյանը, որը կարևորագույն դերակատարություն է ունեցել Հայաստանում ինտերնետի ստեղծման և զարգացման գործում, այդ թվում՝ .am դոմենի ստեղծման գործում, նաև «Ինտերնետ հանրության» կողմից հիմնադրված ARMIX հիմնադրամի ստեղծողներից է, որը ապահովում է հայաստանյան ինտերնետ տիրույթի ինքնուրույնությունը։
Համաժողովի մասնակիցներից մեկը՝ Եվրոպական համալսարանի պրոռեկտոր Արման Գրիգորյանը, նշեց, որ այսպիսի կարևոր միջոցառումը հյուրընկալելը մեծ պատիվ է։ Նա ընդգծեց ինտերնետի խիստ առանցքային դերը ժամանակակից աշխարհում, հատկապես բազմալեզու բովանդակության ձևավորման, գեներացման և հասանելիության ապահովման տեսանկյունից։
ՀՀ ԿԳՄՍՆ Լեզվի կոմիտեի նախագահ Սիրանուշ Դվոյանը կարևորեց նման միջոցառման կազմակերպումը՝ նշելով, որ այն համահունչ է պետական լեզվական քաղաքականության նոր հայեցակարգի սկզբունքներին, որոնցից երկուսն են ներառականությունը և հայերենի թվայնշայնացումը։ Նա նաև նշեց, որ պետական ծառայությունների թվայնացման գործընթացը մարտահրավեր է նաև պետական քաղաքականության համար, քանի որ ոչ բոլոր սոցիալական խմբերին, օրինակ՝ գյուղաբնակներին կամ տարեցներին, կարող է հեշտությամբ հասանելի լինել այդ ծառայությունները։
