ՀՀ առողջապահության նախարար Անահիտ Ավանեսյանը խորհրդարանում լրագրողների հետ զրույցում անդրադարձավ Վեդիի հիվանդանոցում տեղի ունեցած դեպքին, որի գլխավոր բժիշկը մի քանի ամիսների աշխատավարձը տանուլ էր տվել խաղատանը։
Իմ հարցմանը՝ կապված այս իրադարձության հետ, նախարարը հստակեցրեց, որ իրավիճակը լիովին վերահսկելի է։ Նա նշեց, որ բոլոր աշխատակիցների ամիսների աշխատավարձերը վճարված են, բժշկական կենտրոնը շարունակում է իր աշխատանքը նորմալ ռեժիմով, եւ նշանակվել է նոր ժամանակավոր պաշտոնակատար։
«Մեր կողմից, ինչպես նաեւ իմ խորհրդականի կողմից, իրականացվում է ուղիղ եւ անընդհատ վերահսկողություն։ Որեւէ խնդիր կամ անսարքություն չենք գրանցել։ Իրավապահ մարմինների հետ համագործակցությունը շարունակվում է, եւ մենք վստահ ենք, որ խաղատանը կորցրած գումարները կվերադարձվեն»,- նշեց Անահիտ Ավանեսյանը։
Նա հաստատեց նաեւ, որ դեպքի առիթով բացվել է քրեական գործ։ Այս իրադարձությունը, նախարարի խոսքով, հրահրել է համակարգում խորը եւ համապարփակ վերանայում։
«Մենք ընդհանուր առմամբ վերանայում ենք մեր բոլոր հիվանդանոցներում տնօրենների կողմից իրականացվող տեխնիկական, բանկային եւ ֆինանսական հոսքերի վերահսկման հավելյալ մեխանիզմները։ Ցավոք սրտի, պարզվում է, որ նման անհնարին երեւույթը տեղի է ունեցել»,- ընդգծեց նախարարը։
Զրույցի ընթացքում լրագրողները հետաքրքրվեցին նաեւ առողջապահական համակարգում բուժանձնակազմի աշխատավարձերի ընդհանուր հարցերով։ Անահիտ Ավանեսյանը հայտնեց, որ բժշկական ապահովագրական համակարգի ներդրումից հետո առաջացած խնդիրը հարթված է, եւ այս ամիս արդեն բոլոր պակաս տրված աշխատավարձերը փոխանցվել են։ Նա նաեւ հայտարարեց, որ ապահովագրական համակարգի ներդրումից հետո բուժաշխատողների, մասնավորապես նեղ մասնագետների աշխատավարձերի վերանայում է նախատեսված, որը պայմանավորված է այցելուների թվաքանակի կրճատումներով եւ ավելացումներով։ Այս հարցերը, նախարարի խոսքով, առաջիկայում կքննարկվեն բժշկական համայնքի հետ։
