Այս օրերին, երբ հանրային ուշադրությունը կենտրոնացած է խորհրդարանական ընտրությունների վրա, Հայաստանի Հանրապետության իշխանությունները կատարել են հերթական քայլ, որը կարելի է բնութագրել որպես ամոթալի, հակաիրավական և անբարոյական՝ Արցախի Հանրապետության և նրա ժողովրդի նկատմամբ։
ՀՀ վարչական դատարանի նախագահի որոշմամբ անվավեր է ճանաչվել Արցախի Հանրապետությանը պատկանող շենքի նկատմամբ սեփականության իրավունքի պետական գրանցումը։
Այս գործողությունը տեղի է ունենում այն պայմաններում, երբ իշխանությունները չեն կարողացել կանխել Լեռնային Ղարաբաղի հակամարտության խաղաղ կարգավորման գործընթացի խափանմանը, չեն դիմակայել միջազգային իրավունքի հիմնարար նորմերի ոտնահարմանը և չեն կարողացել կանգնեցնել Արցախի ժողովրդի նկատմամբ ատելության և խտրականության քարոզչությանը, որը նպատակ ունի հալածելու և ցեղահանության ենթարկելու Արցախի կորստի հետ չհաշտվող արցախցիներին։
Արցախի Հանրապետության ներկայացուցչության շենքը մեր հայրենակիցների համար ոչ միայն անշարժ գույք է, այլև խորհրդանշում է ագրեսիայի և բռնազավթման ենթարկված պետականությունը։ Այն նաև միակ վայրն է, որտեղ արցախցիները կարող են համատեղել և համակարգել իրենց ջանքերը՝ պաշտպանելու միջազգային իրավունքի հիմնարար նորմերով սահմանված իրենց իրավունքները, որոնք վերահաստատվել են 2023 թվականի նոյեմբերին Արդարադատության միջազգային դատարանի որոշմամբ։ Այս շենքը չի կարող դառնալ քաղաքական առևտրի կամ կեղծ պայմանավորվածությունների առարկա։
Այս հակահայ գործողությունները չեն կոտրելու մեր կամքը՝ պատերազմական և մարդկության դեմ կատարված հանցագործություններով ոտնահարված Արցախի ժողովրդի իրավունքները վերականգնելու, Արցախ վերադարձն ապահովելու և պետականության վերականգնման ուղղությամբ։
Ակնկալում եմ, որ Արցախի ճակատագրով մտահոգ Հայաստանում և Սփյուռքում գտնվող հաստատություններն ու հայրենակիցները կհամաձայնեն իմ կոչին և կբողոքի ձայն կբարձրացնեն՝ պաշտպանելու մեր անօտարելի իրավունքները։
