Երեկվանից Շիրակի մարզում գտնվող Նիկոլ Փաշինյանը այսօր վաղ առավոտից շարունակել է իր նախընտրական քարոզարշավը Գյումրիում։ Նա շրջել է քաղաքի տարբեր թաղամասերով ու փողոցներով՝ բարձրախոսով կոչ անելով քաղաքացիներին «տեր կանգնել խաղաղությանը»։
Քաղաքում անցկացվող քարոզարշավի ընթացքում Փաշինյանին հիմնականում մոտեցել են տարեցներ, ովքեր ողջունում էին նրան։ Սակայն առավել ուշադրության արժանի էր երեխաների մեծ թիվը, որը ուղեկցում էր քարոզարշավին։ Դպրոցահասակ երեխաներին բաժանվել են թխվածքաբլիթներ և քարոզչական նյութեր, իսկ որն առավել ուշագրավ է, նրանք ձեռքերուն պահում էին «Քաղաքացիական պայմանագիր» կուսակցության պաստառները։
Երեկոյան ժամը 20:00-ին նախատեսված է Նիկոլ Փաշինյանի հանրահավաքը Գյումրու Վարդանանց հրապարակում, որտեղ արդեն տեղադրվել է մեծ բեմահարթակ։ Հատկանշական է, որ նախորդ այցելությունների ընթացքում վարչապետին այդպես էլ չէր հաջողվել լեփ-լեցուն հավաք կազմակերպել քաղաքի գլխավոր հրապարակում։ Այս անգամ, ըստ ամենայնի, փորձ է արվում ապահովել առավել մեծ մասնակցություն։ Մեր տեղեկություններով՝ հանրահավաքի մարդաշատությունն ապահովելու նպատակով գործի է դրվել վարչական ողջ ռեսուրսը։ Մարդկանց տեղափոխում են ոչ միայն Շիրակի մարզի տարբեր բնակավայրերից, այլև հարակից մարզերից։ Տեղեկություններ կան նաև, որ հրապարակում ներկա են լինելու քաղաքացիական հագուստով ոստիկաններ։
