Հայաստանի վարչապետ Նիկոլ Փաշինյանը հայտարարել է, որ ԵՄ-ի կամ ԵԱՏՄ-ի անդամակցության հարցով հանրաքվե անցկացնելու օբյեկտիվ անհրաժեշտություն չկա։ Նա արձագանքել է Ռուսաստանի նախագահ Վլադիմիր Պուտինի հայտարարություններին, որոնցում վերջինը առաջարկել էր Հայաստանին հստակեցնել իր դիրքորոշումը Եվրամիությանն անդամակցելու հարցում՝ հանրաքվե անցկացնելով։
«ՌԴ նախագահի հետ աշխատանքային մակարդակում այդ քննարկումն ունեցել ենք, և ես ասել եմ այն, ինչ ասել եմ նաև հրապարակային՝ մինչև այն պահը, երբ դե յուրե և դե ֆակտո ընտրություն կատարելու անհրաժեշտություն չի լինի, մենք նման հարց օրակարգում չենք դնի»,- ասել է վարչապետը։
Փաշինյանը նաև ընդգծել է, որ համաձայն չէ Պուտինի կողմից օգտագործված «ապահարզան» ձևակերպման հետ։ Նրա խոսքով՝ միջպետական հարաբերությունները չի կարելի շփոթել ամուսնության հետ։
«ՀՀ-ն միջպետական հարաբերություններում առաջնորդվում է միջպետական տրամաբանությամբ, և մենք ԵԱՏՄ անդամ ենք, ինչպես մյուս անդամները։ Եվ քանի դեռ ԵԱՏՄ անդամ ենք, լիարժեք մասնակցում ենք որոշումների կայացմանը։ Եվ քանի դեռ անհրաժեշտություն չի առաջացել, չենք պատրաստվում որևէ նման հարց դնել։ Հանրաքվե կանենք այն պահին, երբ օբյեկտիվ անհրաժեշտություն լինի։ Բայց իմ գնահատականն այն է, որ դրա օբյեկտիվ անհրաժեշտությունը պարզապես չկա»,- ասել է նա։
Վարչապետը նաև հստակեցրել է, որ Հայաստանի նպատակը չի եղել, չկա և չի լինելու Ռուսաստանի շահերին վնաս հասցնելը։
«Մենք շարունակելու ենք առաջնորդվել ՀՀ պետական շահերով, շարունակելու ենք խորացնել մեր հարաբերությունները, զարգացնել ՌԴ-ի հետ՝ այն ըմբռնմամբ, որ անխուսափելի տրանսֆորմացիա է տեղի ունենում այդ հարաբերություններում»,- ասել է նա։
Փաշինյանը շեշտել է, որ հայ-ռուսական հարաբերություններում տեղի ունեցող փոփոխությունները օբյեկտիվ բնույթ ունեն և կապված չեն իր անձի հետ։ Նրա խոսքով՝ ՌԴ նախագահի հետ աշխատանքային հարաբերություններն աշխատում են փոխադարձ վստահության հիմքով։
«Մենք ամենասուր հարցերը քննարկել ենք շատ հանգիստ, հարգալից, բարեկամական մթնոլորտում ու միջավայրում՝ փաստերի ու փաստարկների վրա հիմնվելով»,- նշել է վարչապետը։
Ավելի վաղ Ռուսաստանի նախագահ Վլադիմիր Պուտինը հայտարարել էր, որ Երևանը պետք է հստակեցնի իր դիրքորոշումը Եվրամիությանն անդամակցելու հարցում՝ առաջարկելով անցկացնել հանրաքվե։ Նա նաև նշել էր, որ աշխարհում իրավիճակը բավականին բարդ է, և աշխատելու է Մոսկվայի և Երևանի հարաբերությունների կարգավորման վրա։
