Հունիսի խորհրդարանական ընտրությունների նախընտրական քարոզարշավի շրջանակում Գեղամասարում կազմակերպած հանրահավաքում «Հայաստան» դաշինքի առաջնորդ Ռոբերտ Քոչարյանը անդրադարձել է երկրի առջև ծառացած հիմնական մարտահրավերներին՝ շեշտադրելով անվտանգության և տնտեսական զարգացման կարևորությունը։
Ելույթի ընթացքում Ռոբերտ Քոչարյանը նշել է, որ 2020 թվականի պատերազմից հետո մարզում առաջացել են լուրջ անվտանգային և տնտեսական խնդիրներ։ Նրա խոսքով՝ առավել վտանգավոր իրավիճակն այն է, որ հարևան պետությունը հավակնություններ ունի մեր տարածքների նկատմամբ։
«Երբ ասում են «Արևմտյան Ադրբեջան», նրանք նկատի ունենում են հենց մեր տարածքները։ Երբ ասում են՝ «Գյոյչա»-ն իրենց լիճն է, նրանց մտքում նույնպես մեր տարածքներն են»,- նշել է Ռոբերտ Քոչարյանը՝ ընդգծելով, որ Հայաստանը պետք է ճիշտ գնահատի աշխարհաքաղաքական իրավիճակը՝ նոր վտանգներից խուսափելու համար։
Դաշինքի առաջնորդը նաև անդրադարձել է սահմանամերձ բնակավայրերի տնտեսական խնդիրներին՝ հատկապես անասնապահությամբ զբաղվող բնակիչների կողմից արոտավայրերի սահմանափակման հետևանքով առաջացած դժվարություններին։ Նա նշել է, որ սահմանամերձ շրջաններում աշխատատեղերի ստեղծումը դաշինքի առաջնային խնդիրներից է։
«Այստեղ պետք է ստեղծել աշխատատեղեր։ Դա կարող է լինել հողագործություն, կարող է ենթադրել նաև արտոնություններ փոքր և միջին արդյունաբերական օբյեկտներ կառուցելու համար, բայց ամենակարևորը աշխատատեղերն են»,- ասել է նա՝ ընդգծելով, որ սահմանամերձ բնակչության պահպանությունը երկրի անվտանգության կարևոր բաղադրիչ է։
«Մեր խնդիրը հետևյալն է՝ բոլոր սահմանամերձ շրջաններում այնպես անել, որ մարդիկ մնան, աշխատեն։ Այլ տարբերակ փոքր երկրի համար սեփական երկիրը պահելու համար ուղղակի չունենք։ Հայաստանը չի կարող միայն Երևանը լինել»,- հայտարարել է Ռոբերտ Քոչարյանը։
«Հայաստան» դաշինքը ներկայացրել է նաև իր նախընտրական ծրագրի հիմնական կետերը, որոնց շարքում են՝
Բանակի և անվտանգության համակարգի ուժեղացումը։
Ռուսաստանի հետ ռազմավարական հարաբերությունների պահպանումը։
Փոքր և միջին բիզնեսի աջակցությունը։
Գյուղատնտեսության ապահովագրության ներդրումը։
Էլեկտրաէներգիայի ցերեկային սակագնի իջեցումը։
Գույքահարկի բարձրացման մեղմացումը կամ չեղարկումը։
Համատարած հայտարարագրման համակարգի չեղարկումը։
Սոցիալական աջակցության ծրագրերի ընդլայնումը։
Բնապահպանական և ջրային ռեսուրսների կառավարման ծրագրերը։
