Հայաստանը և Հնդկաստանը սկսել են համատեղ աշխատանքներ ռազմական տեխնիկայի մշակման ոլորտում։ Այս մասին լրագրողների հետ զրույցում հայտարարեց պաշտպանության նախարարության փոխնախարար Արման Սարգսյանը։
Փոխնախարարը նշեց, որ Հայաստանը, իր արտաքին քաղաքականության դիվերսիֆիկացման շրջանակում, ընտրել է նաև այս ուղին՝ զարգացնելով համագործակցությունը ռազմական ոլորտում։
Հարցին՝ թե ինչպիսի՞ է Հնդկաստանը որպես գործընկեր, Սարգսյանը պատասխանեց․ «Եթե մեր երկրների միջև հարաբերությունները դրական դինամիկայով են զարգանում, ապա դա բնականոն է։ Մենք տեսնում ենք բարձր մակարդակի փոխայցելություններ, ինչը բխում է Հայաստանի Հանրապետության շահերից։ Մենք չպետք է մնանք մեկնակետում՝ կենտրոնանալով միայն մեր խնդիրների վրա։ Որքան շատ պետությունների հետ, այդ թվում՝ եվրոպական և աշխարհի այն երկրների հետ, որոնք ցանկանում են խաղաղություն հաստատել Հայաստանում, մենք համագործակցում ենք, այդքան ավելի ուժեղ են դառնում մեր պաշտպանական կարողությունները»։
Արման Սարգսյանը վստահեցրեց, որ Հայաստանը որևէ մեկի հաշվին որևէ մեկի հետ հարաբերություններ չի հաստատում, այլ հետևում է դիվերսիֆիկացման ընդհանուր քաղաքականությանը։
