Այսօր Պաշտպանության նախարարության շենքի մոտ կայացած հանդիպման ընթացքում «Միասնության թեւեր» քաղաքական նախաձեռնության անդամ Վարդան Փաշայանը հայտարարեց, որ խաղաղությունը հնարավոր է միայն այն դեպքում, երբ Հայաստանը հզոր, ուժեղ և մարտունակ պետություն է, որի բանակը ապահովված է ռազմական բալանսով։
Նրա խոսքով՝ առաջին քայլը, որը պետք է արվի, դա Հայաստանի Հանրապետության ինքնիշխան տարածքների դեօկուպացիայի հարցը բանակցային սեղան վերադարձնելն է։ «Այս քայլը մեզ կապահովի բանակցային շատ մեծ խորք, և կանգ կառնեն այս զիջումները, որոնք տեղի են ունենում կառավարության կողմից», – նշեց նա։
Վարդան Փաշայանը անդրադարձավ նաև «Միասնության թեւեր» նախաձեռնության ղեկավար Արման Թաթոյանի կողմից ներկայացված անվտանգային քայլերին։ Ըստ նրա՝ ամենակարևոր կետը ռազմական բյուջեի ավելացումն է։ Նա նշեց, որ նախաձեռնությունը պլանավորում է ընդունել օրենսդրություն, որի համաձայն ռազմական բյուջեն չի կարող նվազ լինել Հայաստանի Հանրապետության համախառն ներքին արդյունքի (ՀՆԱ) 8 տոկոսից։
Անդրադառնալով ադրբեջանական զորքերի կողմից Հայաստանի տարածքներում իրականացրած հերթական առաջխաղացումներին՝ Վարդան Փաշայանը հստակեցրեց, որ նրանց նպատակը ոչ թե պաշտպանության նախարարին կամ վարչապետ Նիկոլ Փաշինյանին այդ մասին տեղեկացնելն է, այլ լայն հանրությանը։ «Մեր խոսույթը խաղաղության մասին սուտ է։ Մենք ամեն անգամ մաս առ մաս մեր երկիրը հանձնում ենք, և արդեն հնարավոր է՝ մոտ ժամանակներս ադրբեջանցիները գան ու վերահսկողություն հաստատեն հենց Երեւանի մատույցներում», – նախազգուշացրեց նա։
«Միասնության թեւեր» նախաձեռնության մյուս անդամ Լալա Աբգարյանը նշեց, որ 2022 թվականի պատերազմի ժամանակ 207 զոհերից ոչ ոքի մասին հիշատակություն չի եղել կառավարության կողմից։ Նա հարց ուղղեց պաշտոնատար անձանց՝ պահանջելով բացատրել, թե ինչու է Ադրբեջանը առանց փամփուշտ առաջ գալիս, և ինչու են այս փաստերը թաքցնում։
