Լեհաստանի միջազգային հարաբերությունների ինստիտուտում ելույթ ունենալիս՝ Լեհաստանի Հանրապետությունում պաշտոնական այցով գտնվող Հայաստանի վարչապետ Նիկոլ Փաշինյանը ներկայացրեց Հայաստանի և Ադրբեջանի միջև խաղաղության հաստատման գործընթացի հիմնարար փուլերը։
Երկրի ղեկավարը նշեց, որ խաղաղության հիմքը 1991 թվականի Ալմա-Աթայի հռչակագիրն է, որը հիմք է հանդիսանում երկու երկրների միջև հարաբերությունների կարգավորման համար։ Նա ընդգծեց, որ խաղաղության գործընթացը իր գագաթնակետին հասել է օգոստոսի 8-ին՝ ԱՄՆ նախագահ Դոնալդ Թրամփի նախաձեռնությամբ և մասնակցությամբ Ադրբեջանի նախագահի հետ համատեղ հռչակագրի ստորագրմամբ։
Փաշինյանը կարևորել է ԱՄՆ նախագահի անձնական ներգրավվածությունը՝ որպես գործընթացի հաջողության հիմնական գործոն։ «Առանց ԱՄՆ նախագահի մասնակցության, անձնական ներգրավվածության և նախաձեռնության խաղաղության գործընթացն անորոշ կլիներ»,- ասել է վարչապետը՝ նշելով, որ այս նախաձեռնությունը շատ կարևոր դեր է խաղացել տարածաշրջանում խաղաղության հաստատման համար։
Նա նաև նշել է, որ 2025 թվականը առաջին տարին էր անկախության հռչակումից ի վեր, երբ հայկական և ադրբեջանական զորքերի միջև հրաձգությունների պատճառով չեղան սահմանային զոհեր։ «Հիմա կա իրական խաղաղություն մեր տարածաշրջանում»,- ընդգծել է Նիկոլ Փաշինյանը՝ միաժամանակ նշելով, որ խաղաղությունը կառուցման փուլում է և պահանջում է շարունակական ուշադրություն։
Վարչապետը խոսել է նաև այն կարևոր փուլերի մասին, որոնք նպաստել են խաղաղության հաստատմանը։ Նրանցից մեկը 2022 թվականի հոկտեմբերի 6-ին Եվրոպական քաղաքական համայնքի առաջին գագաթնաժողովի շրջանակում Ֆրանսիայի նախագահ Էմանուել Մակրոնի և Եվրոպական խորհրդի նախագահ Շառլ Միշելի հրավերով Ադրբեջանի նախագահի հետ հանդիպումն էր։ Փաշինյանի համոզմամբ՝ այդ հանդիպման արդյունքում երկու երկրները որոշեցին ճանաչել միմյանց տարածքային ամբողջականությունը, ինքնիշխանությունը և քաղաքական անկախությունը՝ հիմնվելով Ալմա-Աթայի հռչակագրի սկզբունքների վրա։
