Ամերիկյան կողմի նախաձեռնությամբ Ռուսաստանի Դաշնության նախագահ Վլադիմիր Պուտինն ու ԱՄՆ նախագահ Դոնալդ Թրամփը հեռախոսով զրույց են ունեցել, որը տևել է մոտ մեկ ժամ։ Այս մասին հայտնում է Կրեմլի մամուլի ծառայությունը՝ նշելով, որ զրույցը գործնական, անկեղծ և կառուցողական է եղել։
Հեռախոսազրույցի ընթացքում առաջնորդները քննարկել են Իրանում ստեղծված իրավիճակը և ուկրաինական կարգավորման շուրջ բանակցությունները։ Պուտինը մի շարք նկատառումներ է հայտնել՝ ուղղված Իրանում հակամարտության արագ քաղաքական և դիվանագիտական ճանապարհով կարգավորմանը։ Նա բարձր է գնահատել ԱՄՆ-ի և անձամբ Թրամփի միջնորդական ջանքերը Ուկրաինայում հակամարտության կարգավորման գործում։
ԱՄՆ նախագահը, իր հերթին, հետաքրքրություն է հայտնել Ուկրաինայում հակամարտությունն հնարավորինս արագ ավարտին հասցնելու հարցում՝ հրադադարի և երկարաժամկետ կարգավորման միջոցով։
Հիշեցնենք, որ փետրվարի 28-ի առավոտյան ԱՄՆ-ն և Իսրայելը հարվածներ են հասցրել Իրանին՝ սպանելով երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և պաշտպանության խորհրդի քարտուղար Ալի Շամխանին։ Ի պատասխան այդ հարվածներին Իրանը հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին։
Ռուսաստանը դատապարտել է Վաշինգտոնի և Թել Ավիվի գործողությունները՝ նշելով, որ դրանք ոչ մի կապ չունեն միջուկային զենքի չտարածման ռեժիմի պահպանման հետ։ ՌԴ արտգործնախարար Սերգեյ Լավրովը հայտնել է, որ Մոսկվան պատրաստ է աջակցել Իրանի և Իսրայելի միջև լարվածության ցածրեցմանը՝ այդ թվում ՝ ՄԱԿ-ի անվտանգության խորհրդում։
